Isroil tashqi ishlar vaziri Kaya Kallas bilan aloqalarni uzdi

Isroil tashqi ishlar vaziri Gideon Saar Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallas bilan barcha diplomatik aloqalarni to‘xtatganini ma’lum qildi. Bu qaror Kallasning Isroilni Janubiy Afrikadagi aparteid davri rejimiga qiyoslagani haqidagi xabarlar ortidan qabul qilindi.

Foto: Menahem Kahana/AFP

Gideon Saar 18 iyun kuni X ijtimoiy tarmog‘ida e’lon qilgan bayonotida Kaya Kallas so‘nggi vaqtlarda Isroilga nisbatan noxolis va adolatsiz munosabat bildirib kelayotganini ta’kidladi.

Uning so‘zlariga ko‘ra, Yevropa diplomatiyasi rahbari Meksikaga tashrifi chog‘ida Isroilning G‘arbiy sohil va G‘azo sektoridagi siyosatini Janubiy Afrika Respublikasida 1948–1994 yillarda amal qilgan irqiy ajratish — aparteid tizimiga o‘xshatgan.

«Bizda Kallas xonim mazkur ayblovlarini rad etmaguncha yoki qaytarib olmaguncha u bilan aloqalarni to‘xtatishdan boshqa chora qolmadi», — dedi Isroil tashqi ishlar vaziri.

Avvalroq Euractiv nashri Yevropa Ittifoqi diplomatlari va amaldorlariga tayanib, Kallas Meksika rasmiylari bilan uchrashuvda Isroilning falastinliklarga munosabatini aparteid siyosatiga qiyoslaganini xabar qilgan edi.

Mazkur bayonotlarga javoban Kaya Kallas Yevropa Ittifoqi Isroil bilan muloqot va hamkorlikni saqlab qolish tarafdori ekanini bildirdi.

«Men o‘zaro muloqot va hamkorlikni qadrlayman hamda ularni hurmat va konstruktiv ruhda davom ettirishga tayyorman. Ayniqsa kelishmovchiliklar mavjud bo‘lgan paytda diplomatiyaning asosi muloqot hisoblanadi», — deb yozdi u X ijtimoiy tarmog‘ida.

Shu bilan birga, Kallas Yevropa Ittifoqi Yaqin Sharqda barqaror tinchlikka erishishning yagona maqbul yo‘li ikki davlatli yechim ekanini qo‘llab-quvvatlashda davom etayotganini ta’kidladi.

Biroq Saar Kallas o‘z bayonotida aparteid haqidagi so‘zlarni na rad etgani va na qoralaganiga e’tibor qaratdi. Uning fikricha, bu holat mazkur masalaga oydinlik kiritilmaganini ko‘rsatadi.

«Mening bilishimcha, sizga nisbatan aytilgan aparteid haqidagi fikrlar Yevropa Ittifoqining rasmiy pozitsiyasini aks ettirmaydi. Bu masalaga aniqlik kiritilmaguncha qarorimiz o‘zgarmaydi», — dedi Isroil tashqi ishlar vaziri.

Ayni paytda Germaniya kansleri Fridrix Mers ham Isroilni aparteid rejimi bilan taqqoslashga qarshi chiqdi. Bryusseldagi YeI sammiti oldidan jurnalistlarga bergan intervyusida u bunday ta’rifni qabul qilmasligini va bu masala Yevropa yetakchilari tomonidan muhokama qilinishini ma’lum qildi.