Bo‘stonliqda 20 sotix yerni 230 ming dollarga sotishga uringan shaxslar ushlandi

Toshkent viloyatining Bo‘stonliq va Toshkent shahrining Yangihayot tumanlari hududidan pul evaziga yer maydonlari olib berishni va’da qilgan shaxslar ushlandi, deb xabar beradi Bosh prokuratura huzuridagi departament.

Qayd etilishicha, departamentning Bo‘stonliq tumani bo‘limi tomonidan boshqa huquqni muhofaza qiluvchi organ xodimlari bilan hamkorlikda tezkor tadbir o‘tkazilgan. Tadbirda A.A., R.A. va I.S. (muqaddam sudlangan) ismli shaxslar o‘zaro til biriktirib, fuqaro X.A.ga tumandagi “Xo‘jakent” MFY hududidan 20 sotix yer maydoni hujjatlarini rasmiylashtirib, olib berish evaziga 230 ming AQSh dollarini olgan vaqtida ashyoviy dalillar bilan ushlangan.

Shu kabi, departamentning Yangihayot tumani bo‘limi va boshqa huquqni muhofaza qiluvchi organ xodimlari hamkorligida ham tezkor tadbir o‘tkazilgan. Unda S.I. ismli shaxs fuqaro M.O.ning ishonchiga kirib, unga tanishlari yordamida “Yangi Gulzor” MFY hududidagi 18 sotix yer maydonining 200 ming dollar evaziga egalik huquqini beruvchi hujjatlarini rasmiylashtirib berishni va’da qilgani aniqlangan. U oldindan 20 ming dollarni olgan vaqtida ashyoviy dalillar bilan ushlangan.

Mazkur holatlar yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishlari qo‘zg‘atilib, tergov harakatlari o‘tkazilmoqda.

Avvalroq Bo‘stonliq tumanidagi 72,6 sotix noturar yer maydonini 1 mln dollarga sotmoqchi bo‘lgan shaxs qo‘lga olingani to‘g‘risida xabar berilgandi.