1,5 gektar yerni «sotish» bahonasida 750 ming dollar so‘ragan shaxs ushlandi

Toshkent viloyatida davlat zaxirasidagi 1,5 gektar yer maydonini mansabdor tanishlari orqali rasmiylashtirib berishni va’da qilgan shaxs 750 ming dollar talab qilib, oldindan 20 ming dollar olgan vaqtida qo‘lga olindi.

Foto: DXX

Davlat xavfsizlik xizmati Toshkent viloyati bo‘yicha boshqarmasi hamda Iqtisodiy jinoyatlarga qarshi kurashish departamenti xodimlari tomonidan yer maydonini noqonuniy rasmiylashtirib berish bilan bog‘liq holat fosh etildi.

Aniqlanishicha, Toshkent shahrida yashovchi, 1979 yilda tug‘ilgan shaxs tadbirkorlik faoliyati bilan shug‘ullanmoqchi bo‘lgan fuqaroning ishonchiga kirib, Yangiyo‘l tumanida joylashgan va davlat zaxirasida bo‘lgan 1,5 gektar yer maydonini arxitektura hamda kadastr tizimlarida ishlovchi mansabdor tanishlari orqali uning nomiga rasmiylashtirib berishini aytgan.

Evaziga u 750 ming AQSh dollari talab qilgan.

O‘tkazilgan tezkor tadbir davomida gumonlanuvchi so‘ralgan mablag‘ning bir qismi sifatida oldindan 20 ming AQSh dollarini olgan vaqtida ashyoviy dalillar bilan ushlandi.

Hozirda mazkur holat yuzasidan jinoyat ishi qo‘zg‘atilgan bo‘lib, tergov harakatlari olib borilmoqda.

DXX fuqarolarni shu kabi qonunbuzilish holatlariga duch kelgan taqdirda idoraning 1520 qisqa raqami orqali murojaat qilishga chaqirdi. Ma’lum qilinishicha, murojaat etuvchilarning shaxsi sir saqlanishi kafolatlanadi.