Xalqaro kosmik stansiyada 9 oy qolib ketgan astronavtlar Yerga qaytmoqda

NASA astronavtlari Butch Uilmor va Suni Uilyams kosmosdagi to‘qqiz oylik safardan so‘ng nihoyat Yerga qaytmoqda, deb yozadi BBC. Ular Xalqaro kosmik stansiyada (XKS) sakkiz kun qolishi kerak edi, biroq texnik muammolar sababli ularning missiyasi uzoq muddatga cho‘zilib ketdi.

Uilmor va Uilyams NASA astronavti Nik Heyg hamda rossiyalik kosmonavt Aleksandr Gorbunov bilan birga SapceX kapsulasida Yerga qaytyapti. Ular 18 mart kuni Grinvich vaqti bilan 05:05 da XKSdan ajralib chiqqan va soat 21:57 da Floridaning qirg‘oqlari yaqiniga qo‘nishi kutilmoqda.

Avvaliga SapceX kompaniyasining Dragon kapsulasi katta tezlikda Yer atmosferasiga kiradi, bunda uning harorati Tselsiy bo‘yicha 1600 darajagacha qiziydi. So‘ng kapsula tezligi kamayib boradi va astronavtlar Yer tortish kuchidan to‘rt baravar katta bo‘lgan ortiqcha yuklanishga bardosh berishi kerak bo‘ladi. Nihoyat, apparat to‘rtta yirik parashyut yordamida okeanga yumshoq tarzda qo‘nadi.

Suni va Butchning sayohati 2024 yil iyunda boshlangan edi. Astronavtlar Boeing kompaniyasi tomonidan yaratilgan Starliner kosmik kemasining birinchi sinovida ishtirok etdi.

Kosmik stansiyaga parvoz vaqtida kapsulada qator texnik muammolar kuzatildi, shu bois astronavtlarning unda uyga qaytishi xavfli deb topildi. O‘tgan yilning sentabrida Starliner Yerga ekipajsiz qaytdi. Bu esa Butch va Sunini qaytarish uchun yangi kema kerakligini anglatardi. Shuning uchun NASA sentabr oyida XKSga borgan SapceX kapsulasini tanladi.

Dragon kapsulasida stansiyaga to‘rt nafar astronavt o‘rniga ikki kishi uchib bordi — Butch va Suni uchun bo‘sh joy qoldirildi. Muammo shunda ediki, SapceX parvozi 6 oyga mo‘ljallangandi, natijada astronavtlarning XKSda qolish muddati 2025 yil mart oyiga qadar cho‘zilib ketdi.

SapceX kapsulasi 16 mart kuni ertalab to‘rt nafar astronavtni — Enn MakKleyn va Nikol Ayyers, yaponiyalik astronavt Takui Onisi va rossiyalik kosmonavt Kirill Peskovni Xalqaro kosmik stansiyaga yetkazdi. Endi esa Yerga Butch Uilmor, Suni Uilyams, Nik Xeyg va Aleksandr Gorbunov qaytmoqda.