Navro‘z bayramida Toshkentda avtobus va metro qanday tartibda harakatlanishi ma’lum qilindi

Toshkentda bayram kunlari avtobus saroylariga biriktirilgan avtobus yo‘nalishlarining faoliyati belgilangan tartibda tashkil etiladi. Bu haqda «Toshshahartransxizmat» xabar berdi.

Xususan, 21- va 23 mart kunlari avtobuslar yakshanba kuni uchun tasdiqlangan jadval asosida, 22 mart kuni esa shanba kunidagi jadval asosida harakatlanadi.

Kompaniya bayram kunlari transport harakati ko‘payishi sababli shaxsiy avtomobilda harakatlanishdan voz kechib, jamoat transportidan foydalanishni taklif qilmoqda.

Shu bilan birga, Toshkent metropoliteni metro yo‘nalishlarining bayram kunlaridagi faoliyati haqida ma’lumot berdi.

Unga ko‘ra, 21-, 22 mart kunlarida metro poyezdlari harakati shanba, 23 mart kuni esa, yakshanba kuni uchun belgilangan jadval asosida harakatlanadi.

Avvalroq Navro‘z va Ramazon hayiti munosabati bilan Toshkent—Buxoro—Toshkent yo‘nalishida qo‘shimcha «Afrosiyob» elektropoyezdi harakati yo‘lga qo‘yilishi to‘g‘risida xabar berilgandi.