Germaniya Bundestagi qo‘mitasi Kiyevga 11 mlrd yevrolik yordamni ma’qulladi

Germaniya Bundestagining Budjet qo‘mitasi Ukrainaga 11 milliard yevrodan ortiq miqdorda qo‘shimcha harbiy yordam ajratishni ma’qulladi, deb xabar bermoqda dpa va AFP agentliklari 21 mart, juma kuni.

«Shunday qilib, allaqachon rejalashtirilgan yordamga qo‘shimcha ravishda, joriy yil uchun yana uch milliard yevro ajratildi. 2026 yildan 2029 yilgacha bo‘lgan davr uchun umumiy qiymati 8,25 milliard yevro bo‘lgan qo‘shimcha majburiyatlar ham tasdiqlandi», deyiladi AFP xabarida.

«Paket sanoat va Ukraina bilan kelishilgan va endi zarur materiallarni tezda taqdim etishi mumkin», dedi Germaniya Sotsial-demokratik partiyasi (GSDP)dan parlament a’zosi Andreas Shvars ushbu qarorga izoh berib. Shu tariqa Bundestag Kreml rahbari Vladimir Putinga muhim signal yubormoqda, deya qo‘shimcha qildi parlamentariy. «Biz o‘z so‘zimizda turamiz, mas’uliyatni o‘z zimmamizga olamiz, G‘arb ittifoqi va Ukrainani mustahkamlaymiz», — deya uning so‘zlarini keltiradi dpa agentligi.

O‘z navbatida, «yashillar» partiyasidan Bundestag deputati Sven-Kristian Kindler ta’kidlaganidek, tarixiy moliyaviy paket bilan birgalikda Ukrainaga qo‘shimcha ko‘p milliardlik yordam ajratish to‘g‘risidagi qaror «Germaniya Yevropada xavfsizlik va tinchlik uchun mas’uliyatni o‘z zimmasiga olganligining muhim belgisidir».

19 mart kuni Reuters agentligi Germaniya Moliya vazirligi hujjatiga tayanib, Germaniya Ukrainaga joriy yilda 3 milliard yevro, 2026—2029 yillarda esa 8 milliard yevrodan ortiq qo‘shimcha harbiy yordam ajratishni rejalashtirayotgani haqida xabar berdi.

Avvalroq Germaniya kansleri Olaf Shols o‘zini Rossiyadan himoya qilayotgan Ukrainaga harbiy yordam ko‘rsatish davom etishini ma’lum qilgandi. «Ukraina bizga tayanishi mumkin, Ukraina Yevropaga tayanishi mumkin, biz uni tashlab qo‘ymaymiz, degan fikrda ikkalamiz ham birdekmiz», dedi u Berlinda Fransiya prezidenti Emmanuel Makron bilan muzokaradan so‘ng.