NYT: SpaceX Tramp ma’muriyatidan milliardlab dollarlik shartnomalar oladi

Ilon Mask AQSh Hukumat samaradorligi departamenti (DOGE) rahbari sifatida qator idoralarni yopish va yuzlab xodimlarni ishdan bo‘shatish orqali davlat xarajatlarini qisqartirish tashabbusini ilgari surmoqda. Shu bilan birga, uning SpaceX kompaniyasi ayrim idoralardan milliardlab dollarlik federal shartnomalarni qo‘lga kiritishga tayyorlanyapti, deb yozadi The New York Times.

Gazetaning qayd etishicha, Mudofaa vazirligining yangi rahbariyati Maskka tegishli kompaniya harbiylarga yuklarni sayyora bo‘ylab tashishda ilg‘or va istiqbolli usullarni taqdim etishi mumkin deb hisoblamoqda. Savdo vazirligi esa kompaniyani shaharlardan tashqarida keng polosali internetni rivojlantirish loyihasida ishtirok etish uchun mos deb topgan. Loyihaning umumiy qiymati 42 milliard dollarni tashkil etadi.

NASA’ga bo‘lsa Maskning Marsni tadqiq qilish va u yerga birinchi astronavtlarni yuborish loyihalariga alohida e’tibor qaratish tavsiya etilmoqda. Shuningdek, Oq uy va Federal fuqarolik aviatsiyasi boshqarmasi hukumatning internetdan foydalanish imkoniyatini oshirish uchun Starlink uskunalarini o‘rnatgan. Bundan tashqari, kompaniya davlat mulkidan foydalanish uchun keng imkoniyatga ega bo‘lgan.

«Ilon nimani so‘rasa, o‘shani qo‘lga kiritish imkoniyati juda baland. U Oq uyda ham, Trampning Floridadagi qarorgohi Mar-a-Lagoda ham o‘z odami hisoblanadi. Hech kim uning hokimiyatda bunday kuchli ta’sirga ega bo‘lishini kutmagan edi», — deydi Federal savdo komissiyasining sobiq xodimi Bler Levin.

Tesla va SpaceX bosh direktori Ilon Mask Donald Trampni saylovoldi kampaniyasi vaqtida faol qo‘llab-quvvatlagan va uning asosiy homiysiga aylangan edi. Saylovdagi g‘alabadan keyin ushbu milliarder Tramp ma’muriyatida Hukumat samaradorligi departamenti rahbari lavozimini oldi, uning vazifasi o‘zining so‘zlariga ko‘ra, budjet xarajatlarini, shishirilgan apparatlarni qisqartirish va korrupsiyaga qarshi kurashishdan iborat.