Belgiya davlat idoralari saytlari hakerlar hujumiga uchradi

Hakerlar guruhi Belgiyaning bir qator muhim davlat saytlariga hujum uyushtirdi, deb xabar beradi Belga agentligi.

Xususan, hukumatning belgiyaliklarga rasmiy hujjatlardan foydalanish imkoniyatini taqdim etuvchi MyGov.be sayti, shuningdek, Valloniya parlamenti sayti ham kiberhujumga uchragan.

Kiberxavfsizlik markazi bayonotiga ko‘ra, gap serverlar faoliyatini falajlovchi DDos-hujumlar haqida ketmoqda. Markazning ma’lum qilishicha, ushbu hujumlar kiberqaroqchilarga ma’lumotlarni o‘g‘irlash imkoniyatini bermaydi.

Hujumni Rossiyaning NoName hakerlik guruhi uyushtirgan bo‘lishi mumkinligi aytildi. RTBF telekanali ma’lumotlariga ko‘ra, hakerlar ijtimoiy tarmoq orqali hujum Belgiya tomonidan Ukrainaga 1 milliard yevrolik yordam paketi ajratilganiga javob hisoblanishini bildirgan. Belgiya mudofaa vaziri Teo Franken mart boshlarida Ukraina prezidenti Volodimir Zelenskiy bilan uchrashuvda ushbu yordam paketini taqdim etgandi.

Mutaxassislarning ta’kidlanishicha, bu nisbatan zararsiz DDos-hujumdir. Serverlar ko‘plab so‘rovlar bilan «bombardimon» qilinadi, bu ularni ortiqcha yuklab, haqiqiy foydalanuvchilar uchun foydalanib bo‘lmaydigan holga keltiradi.

Fevral oyida Myunxen xavfsizlik konferensiyasi ochilishi arafasida Bavariya davlat idoralari DDos-hujumga uchragan edi. O‘shanda rasmiylar buni «rossiyaparast hakerlik faoliyati» deb atagandi.