Россиялик ҳакерлар MSC арафасида Бавариядаги киберҳужумда гумонланмоқда

Давлат канцелярияси ва Бавария рақамлаштириш вазирлиги Мюнхен хавфсизлик конференцияси очилиши арафасида ҳакерлик ҳужумига учради. Бу ҳақда 16 феврал, якшанба куни давлат ахборот хавфсизлиги бошқармасига таяниб, dpa агентлиги хабар берди.

Ҳужум Россия билан боғлиқ

Бавария ҳукумати DDoS-ҳужум 13 феврал куни содир бўлганини билдирди. Ҳужумчилар кўп сонли кўришлар билан серверларни ортиқча юклашга ҳаракат қилишди. Агентлик манбаларининг таъкидлашича, ҳужум «россияпараст ҳакерлар фаолияти» билан боғлиқ. Уларнинг сўзларига кўра, ҳеч қандай зарар кўрилмаган, маълумотлар ўғирланмаган, бироқ ҳужумга учраган сайтлар вақтинча ишламаган.

Bayerischer Rundfunk медиакомпанияси маълумотларига кўра, 13 феврал куни эрталаб Бавария ҳукумати сайти тахминан олти соат давомида ишламай қолган, экранда хато хабари пайдо бўлган. Бундан ташқари, Бавария полицияси, шунингдек, Мюнхен округи маъмурияти ва Бавария пойтахти яқинидаги Гархинг шаҳри сайти ҳам DDoS-ҳужумга учради.

Бавария жиноий полиция идораси тергов олиб бормоқда ва ҳакерлик ҳужуми Мюнхен хавфсизлик конференцияси ёки 24 ёшли афғонистонлик ўша куни иш ташлаганлар устига машина ҳайдаб боргани билан боғлиқми, ҳозирча аниқ айта олмаяпти. Икки кундан кейин 37 ёшли аёл ва унинг икки ёшли қизи олган жароҳатлари туфайли вафот этди.