NATO bosh kotibi Putinga bosqinga qarshi «qaqshatkich javob» va’da qildi

U Rossiyani agressiyadan tiyilishga chaqirdi va «agar kimdir xatoga yo‘l qo‘yib, Polshaga yoki ittifoqdoshlarimizdan biriga qilingan hujum jazosiz qolishiga ishonsa, u NATOning butun salohiyatiga duch keladi. Javobimiz halokatli bo‘ladi. Bu Vladimir Putinga va bizga hujum qilishga jur’at qiladigan barcha uchun aniq-tiniq bo‘lishi kerak», — deya Ryuttening Varshavada Polsha bosh vaziri Donald Tusk bilan o‘tkazilgan qo‘shma matbuot anjumanidan iqtibos keltirmoqda Associated Press.

NATO bosh kotibi shuningdek, AQShning NATO Ustavining 5-moddasida belgilangan jamoaviy xavfsizlik kafolatlariga sodiqligidan mutlaqo ishonchda ekanini bildirdi. «Ijozat bersangiz, anig‘ini aytay: hozir Yevropa yoki Shimoliy Amerika uchun alohida harakat qilish vaqti emas. Zamonaviy global xavfsizlik tahdidlari shunchalik jiddiyki, ularni ayri holda yechib bo‘lmaydi», — deya ta’kidladi u.

Ryuttening ta’kidlashicha, iyun oyida Niderlandiyada bo‘lib o‘tadigan NATO sammiti transatlantik ittifoq tarixida yangi bosqichni boshlab beradi. Uning so‘zlariga ko‘ra, alyans tahdidlarga qarshi samarali kurash olib borish uchun «ko‘proq kuchli, adolatli va ajalvor» bo‘lishi kerak. Ryutte sammitda mudofaa xarajatlari bo‘yicha yangi, yanada ambitsiyali maqsadlar belgilash rejalashtirilayotganini bildirdi. Ayni paytda NATOga a’zo 23 davlat harbiy budjetlariga yalpi ichki mahsulotning kamida 2 foizini ajratish bo‘yicha standartga amal qilmoqda. Ammo Ryuttega ko‘ra, yangi maqsad «ancha yuqori bo‘lib, 3 foizdan yuqori bo‘lishi» mumkin.

Fevral oyida Daniya harbiy razvedkasi Yevropa kelgusi besh yil ichida «keng ko‘lamli urush»ga duch kelishi mumkinligini ma’lum qilgan edi. Idoraning baholashicha, agar Rossiya NATOni harbiy yoki siyosiy jihatdan zaif deb hisoblasa, alyans davlatlariga qarshi kuch ishlatishga qaror qilishi mumkin.

Bundan avvalroq, yanvar oyida Yevropa Ittifoqining diplomatik idorasi rahbari Kaya Kallas ham shunday ogohlantirish bilan chiqqan. Unga ko‘ra, Rossiya 2028 yilga kelib YeI a’zosi bo‘lgan mamlakatlardan biriga hujum qilishi mumkin. Kallas bu ehtimolni hisobga olgan holda nafaqat mudofaa sohasiga sarmoya kiritish, balki xavf-xatarga tayyor turish lozimligini urg‘ulagan. U Yevropa razvedka xizmatlarining ma’lumotlariga tayanadi, unga ko‘ra Kreml yaqin 3–5 yil ichida YeIning mudofaaga tayyorligini «sinab ko‘rishi» mumkin.

Mart oyi boshida Germaniya Federal razvedka xizmati (BND) rahbari Bruno Kahl ham shunga o‘xshash fikr bildirgan edi. U Rossiyaning Yevropa davlatlariga hujum qilish rejalari nazariy ssenariyligicha qolaverishidan umid qilayotgani, ammo bunday ssenariyni to‘liq istisno qilib bo‘lmasligini aytgan edi.