Toshkentda ayrim avtobus yo‘nalishlariga o‘zgartirish kiritildi

Transport vazirligi 28 mart sanasidan boshlab Toshkent shahridagi ayrim avtobus yo‘nalishlariga o‘zgartirishlar kiritilishini ma’lum qildi. Shahar transport va yo‘l-transport infratuzilmasini rivojlantirish bosh boshqarmasi boshlig‘ining bu boradagi tegishli buyrug‘i imzolangan.

Qayd etilishicha, amaldagi 190-sonli «Yangibozor AShB — Mashinasozlar metrosi» yo‘nalishi Yangi O‘zbekiston ko‘chasi orqali Yangi Toshkent bekatigacha bir tomonlama harakat qiladi. So‘ng o‘zining avvalgi yo‘nalishi bo‘ylab harakatni davom ettiradi.

137-sonli avtobus yo‘nalishi endi Istiqbol mahallasi bekatidan Parkent yo‘li ko‘chasi orqali Yangi Toshkent bekatigacha ikki tomonlama harakat qiladi. «Istiqbol mahallasi — Qo‘shqo‘rg‘on mahallasi» yo‘nalishi nomi «Yangi Toshkent bekati — Qo‘shqo‘rg‘on mahallasi» deb o‘zgartiriladi.

Bundan tashqari, yangi 197-sonli «O‘zbekiston mehmonxonasi bekati — Yangi Toshkent bekati» yo‘nalishi tashkil etiladi. Ushbu yo‘nalish Maxtumquli va Yangi O‘zbekiston yo‘li ko‘chalari orqali harakatlanadi.

Eslatib o‘tamiz, mart boshida Toshkentda tarovih namozlari sabab ayrim ko‘chalar vaqtincha yopilgan va bir qator avtobus yo‘nalishlari o‘zgartirilgan edi.