AQSh qo‘shinlari jinoiy to‘dalar tufayli Ekvadorga kiritilishi mumkin

Ekvador AQSh qo‘shinlarining kiritilishiga tayyorgarlik ko‘rmoqda, deb xabar berdi CNN yuqori martabali mulozimga tayanib. Janubiy Amerikaning ushbu davlati prezidenti Daniel Noboa amerikalik hamkasbi Donald Trampni jinoiy to‘dalarga qarshi kurashda yordam berishga chaqirdi.

Manbaning aytishicha, bu tayyorgarlikning bir qismi Manabi provinsiyasining qirg‘oq bo‘yidagi Manta shahrida amerikalik askarlarni joylashtirish uchun yangi harbiy-dengiz inshootini qurishdir.

«U baza oxir-oqibat AQSh qo‘shinlari tomonidan egallanishi kutilmoqda», dedi rasmiy.

Qurilish rejalariga ko‘ra, Ekvador Mudofaa vazirligi Manta port ma’muriyati bilan 150 metrlik pirs qurish va portni 700 kvadrat metrdan ortiqroq kengaytirish bo‘yicha shartnoma imzolagan. Imzolash jarayonida AQSh vakili ishtirok etdi, dedi Ekvador rasmiysi.

Avvalroq, Ekvador prezidenti Noboa AQSh, Yevropa va Braziliya armiyalari jinoiy to‘dalarga qarshi kurashga qo‘shilishlarini istayotganini aytgan edi. U, shuningdek, Amerika prezidenti Meksika va Venesuela kartellari bilan qilganidek, Ekvador to‘dalarini terrorchi tashkilotlar deb belgilashiga umid qilmoqda.

«Agar u Los Lobos, Los Choneros, Los Tigeronesni terrorchi tashkilotlar deb tan olsa, xursand bo‘lardim, chunki ular aslida shunday», dedi Noboa.

So‘nggi yillarda Ekvadorda jinoiy to‘dalar giyohvand moddalar savdosi yo‘llarini nazorat qilish uchun kurashayotgani sababli zo‘ravonlik keskin oshdi. Noboa so‘zlariga ko‘ra, kokainning 70 foizi Ekvadordan o‘tadi. «Biz xalqaro kuchlarning yordamiga muhtojmiz», deb tan oldi u.

Uning so‘zlariga ko‘ra, jinoiy to‘dalar 14 ming nafar qurolli kishidan iborat «xalqaro narkoterrorchi» guruhlarga aylangan.

Kartellarga qarshi kurash 13 aprel kuni Ekvadorda bo‘lib o‘tadigan prezidentlik saylovining ikkinchi bosqichi oldidan asosiy masala. Uning raqibi «Fuqarolar inqilobi» so‘l harakati nomzodi Luiza Gonsales bo‘lib, u mamlakatda har qanday xorijiy kuchlarning joylashtirilishiga qarshi.