Inklyuzivlik bo‘yicha munozara: Fransiya AQShning aralashuvini qoraladi 

Fransiya tashqi savdo vazirligi AQShning Parijdagi elchixonasi fransuz kompaniyalariga xilma-xillik, tenglik va inklyuzivlik siyosatidan zudlik bilan voz kechish talab qilingan xat yuborganidan so‘ng «Amerika aralashuvini» qoraladi. «Amerikaning fransuz kompaniyalarining inklyuzivlik siyosatiga aralashuvi, masalan, asossiz bojxona to‘lovlarini kiritish tahdidi qabul qilinishi mumkin emas», deyiladi Franceinfo radiosi va AFP agentligi tomonidan 29 mart, shanba kuni chop etilgan bayonotda.

«Fransiya va Yevropa o‘z kompaniyalari, iste’molchilari va qadriyatlarini himoya qiladi», — deyiladi hujjatda.

Trampning farmoniga iqtibos keltirilgan maktub 

Avvalroq, Fransiya ommaviy axborot vositalarida, xususan, Le Figaro gazetasida Oq uy rahbari Donald Trampning «noqonuniy kamsitishlarga barham berish va kasbiy imkoniyatlarni tiklash» haqidagi 14173-sonli farmoniga iqtibos keltirgan holda AQShning Parijdagi elchixonasi maktubi paydo bo‘lgan edi. Xabarda Trampning hujjati qaysi davlatda faoliyat yuritishidan qat’i nazar, AQSh hukumatining barcha yetkazib beruvchi va pudratchilariga taalluqli bo‘lishi nazarda tutilgan.

Maktubda, shuningdek, fransuz kompaniyalari besh kun ichida javob berishi kerakligi aytilgan. Agar rad javobi berilsa, firmalar batafsil tushuntirishlar berishi kerak, keyin esa AQSh yuridik organlariga yuboriladi, deyiladi hujjatda.

Bu AQSh hukumati bilan tijorat shartnomasi tuzgan kompaniyalar diskriminatsiyaga qarshi barcha qoidalarni buzishi kerakligini anglatardi, deb ta’kidladi Franceinfo.