Germaniyada chiqindini kim noto‘g‘ri saralayotganini aniqlashda sun’iy intellektdan foydalanish boshlandi

Bild nashrining yozishicha, endi organik chiqindilar tarkibidagi begona aralashmalar 3 foizdan, undagi plastik ulushi esa 1 foizdan oshmasligi kerak. Ayrim mintaqalarda bu kabi qoidabuzarliklarni aniqlash uchun maxsus texnologiyalar va hatto sun’iy intellektdan foydalanish boshlangan. Yangi qoidalarga rioya qilmagan fuqarolar jarimaga tortiladi.

Masalan, Baden-Vyurtemberg yerlaridagi Esslingen hududida chiqindilarni saralash talablariga bo‘ysunmaydigan fuqarolarni aniqlashda sun’iy intellekt bazasidagi tizimdan foydalanish rejalashtirilgan. Unga qo‘shni Alb-Dunayda esa joriy kuzdan boshlab 2100 taga yaqin konteyner vizual ravishda tekshiriladi, idishlarda rangli birkalar paydo bo‘ladi: yashil — hammasi joyida, sariq — biroz kamchilik borligini anglatadi. Agar konteynerda qizil rang turadigan bo‘lsa, kommunal xizmat xodimlari uni olib ketmaydi.

Ulm shahrida biokonteynerlar masofadan turib bloklab qo‘yilishi mumkin. 25 yevro miqdorida jarima to‘langanidan keyin ularning ochilishiga ruxsat beriladi. Myunxenda bo‘lsa, hozirda sun’iy intellektga ega kamera bilan jihozlangan chiqindi tashuvchi mashina testdan o‘tkazilmoqda — u biochiqindidagi begona buyumlarni aniqlashga qodir.

Erfurtda esa hukumat boshqacha yo‘nalishdan foydalanmoqda: 15 yildan beri u yerda chiqindi qaysi xonadondan tashlanganini aniqlashga qodir identifikatsiya tizimi amalda. Tizimli ravishda qoidabuzarlik sodir etilsa, chiqindi tashlanadigan idish olib ketilishi va jarima 5 ming yevrogacha yetishi mumkin.