Yaponiyada tog‘larga chiqa oladigan robot-ot taqdim etildi

Yaponiyaning Kawasaki kompaniyasi Osaka-Kansai Expo 2025 ko‘rgazmasida Corleo robot-ot konsepsiyasini taqdim etdi. Kompaniya uni shaxsiy harakatchanlikning kelajagi va ajoyib qobiliyatga ega inqilobiy yo‘ltanlamas deb atadi.

Qurilma vodorodli dvigatel va manzilni aniqlab, barqarorlikni ta’minlaydigan sun’iy intellekt (SI) bilan jihozlangan.

Corleo to‘rtta robot oyoqqa ega bo‘lib, bunda orqa oyoqlar oldingi oyoqlardan mustaqil ravishda yuqoriga va pastga harakatlana oladi. Ushbu dizayn yurish va yugurishda harakatlarni samarali barqarorlashtirish imkonini beradi. Qurilma chavandozning og‘irligini siljitish orqali boshqariladi.

«Bu shunchaki transport vositasi emas, balki har qanday relefda harakatlana oladigan, hatto qorli tog‘lardan sakrab o‘tadigan to‘rt oyoqli yo‘ltanlamas», deyiladi Kawasaki xabarida.

Kompaniya robot-ot imkoniyatlarini namoyish qiluvchi videorolikni e’lon qildi. Ko‘rinishidan, video qurilmaning funksionalligini aniq ifodalash uchun neyrotarmoq yordamida yaratilgan.

To‘rt oyoqning barchasi maxsus kauchukli «tuyoqlar» bilan jihozlangan bo‘lib, ular notekislikdan samarali o‘tadi va sirpanishga juda chidamli. Yana bir diqqatga sazovor xususiyat - vodorod darajasi, navigatsiya ma’lumotlari, tortishish markazining pozitsiyasi va boshqa muhim ma’lumotlarni aks ettiruvchi asboblar paneli.

Hozircha bu kompaniya tomonidan taqdim etilgan barcha ma’lumotlar. Tezlik va avtonomiya haqidagi ma’lumotlar oshkor etilmagan. Kawasaki robot-otni 2050 yilgacha chiqarishni reja qilmoqda.