Eron armiyasi jangovar shay holatga keltirildi - Reuters

Eron oliy rahnamosi oyatulloh Ali Xominaiy AQSh prezidenti Donald Trampning ehtimoliy hujum to‘g‘risidagi bayonoti fonida mamlakat Qurolli kuchlarini jangovar shay holatga keltirdi, deb xabar beradi Reuters agentligi.

Ali Xominaiy bunday buyruqni qachon berganiga aniqlik kiritilmagan.

Agentlik suhbatdoshining so‘zlariga ko‘ra, Eron Iroq, Kuvayt, BAA, Qatar, Turkiya va Bahraynga AQShning Eronga hujumini qo‘llab-quvvatlash, jumladan, amerikalik harbiylar tomonidan ushbu mamlakatlar hududidan (havo makonidan ham) foydalanish «dushmanlik harakati» sifatida baholanishi haqida xabar yuborgan. Eron tomonining ta’kidlashicha, bu ular uchun «jiddiy oqibatlarni» yuzaga keltiradi.

Mart oyida AQSh prezidenti Donald Tramp Eron oliy rahnamosi oyatulloh Ali Xominaiyga maktub yo‘llab, ikki oy ichida yangi yadroviy bitim tuzish shartini qo‘ygani ma’lum bo‘lgandi. «Agar Eron muzokara qilmasa, bu juda yomon bo‘ladi. Eron yadro quroliga ega bo‘lmasligi kerak. Boshqa variantlar ham bor», degan Amerika rahbari. Keyinroq Eron prezidenti Mas’ud Pizishkiyon bunga javob qaytarib, AQSh bilan yadroviy dastur bo‘yicha to‘g‘ridan to‘g‘ri muzokaralarni rad etdi, ammo bilvosita aloqalar o‘rnatish imkoniyati borligini ma’lum qildi.

30 mart kuni Tramp NBC News’ga bergan intervyusida Vashington va Tehron Eronning yadroviy dasturi bo‘yicha kelishuvga erisha olmaganini aytdi.

Eronning yadroviy dasturini cheklashni nazarda tutgan bitim 2015 yilda bir qator davlatlar – AQSh, Buyuk Britaniya, Fransiya, Germaniya, Rossiya va Xitoy tomonidan imzolanib, BMT Xavfsizlik Kengashi rezolyutsiyasi bilan tasdiqlangan edi. 2018 yilda Tramp Eronning yadroviy dasturi bo‘yicha olingan razvedka ma’lumotlariga asoslanib, AQShni bitimdan bir tomonlama ravishda chiqargan.