Suriya muvaqqat prezidenti Ahmad ash-Shar’aning akasi prezident ma’muriyati bosh kotibiga aylandi

Suriya muvaqqat prezidenti Ahmad ash-Shar’aning akasi Mohir ash-Shar’a prezident ma’muriyati bosh kotibiga aylandi. Uning tayinlangani haqida aprel boshlarida bir qator arab nashrlari xabar bergandi.

Londonda joylashgan Al-Araby Al-Jadeed nashri ma’lumotlariga ko‘ra, tayinlovga qadar Mohir ash-Shar’a 2024 yil dekabrda Bashar Asad rejimi qulaganidan keyin shakllantirilgan o‘tish davri hukumati tarkibida sog‘liqni saqlash vaziri vazifasini bajaruvchi lavozimida faoliyat yuritgan.

Rossiya OAVga ko‘ra, Mohir ash-Shar’a oldin «Rossiya temiryo‘llari»ning Voronejdagi shifoxonasida ishlagan. Gazeta.ru nashrining yozishicha, ash-Shar’a 2014 yildan 2021 yilga qadar Voronejdagi Yo‘l klinik shifoxonasida ginekolog bo‘lgan. Ta’kidlanishicha, ash-Shar’a Burdenko nomidagi Voronej tibbiyot universitetini tamomlagan va 2018-2022 yillarda 1-sonli poliklinikaning ayollar konsultatsiyasi bo‘limiga rahbarlik qilgan.

Ijtimoiy tarmoqlarda tarqalgan ma’lumotlarni o‘rganib chiqqan «Agenstvo» nashri Mohir ash-Shar’a «Rossiya temiryo‘llari» muassasalarida ishlaganini tasdiqlagan. Chegara xizmati ma’lumotlariga ko‘ra, 2022 yil iyulda ash-Shar’a Izmirga uchib ketgan va shundan keyin Rossiyaga qaytmagan. Shuningdek, aniqlanishicha, ash-Shar’a 2020 yilga qadar biznes bilan shug‘ullangan Tatyana Zakirova ismli Rossiya fuqarosiga uylangan. Ularning uch nafar farzandi bor, to‘ng‘ich o‘g‘li 23 yoshda va u Voronej davlat universitetiga o‘qishga kirgan.

Arab OAVga ma’lumotlariga ko‘ra, Mohir ash-Shar’a 1973 yilda Damashqda tug‘ilgan. Tibbiyot fanlari sohasida doktorlik darajasini olgan, mutaxassisligi — ginekologik jarrohlik, shuningdek, bepushtlikni davolash. Bundan tashqari, uning sog‘liqni saqlash tizimlarini boshqarish bo‘yicha ham diplomi bor. 2022-2023 yillardan ash-Shar’a Suriya shimolidagi shifoxonalarda tibbiyot maslahatchisi sifatida ishlagan.

Eslatib o‘tamiz, yanvar oxirida Suriyaning vaqtincha hukumati ma’muriyati rahbari Ahmad ash-Shar’a mamlakatning o‘tish davridagi prezidentiga aylangan edi. O‘shanda yangi hukumat mamlakat konstitutsiyasi bekor qilinishi, shuningdek, barcha xavfsizlik kuchlari va qurolli tuzilmalar tarqatib yuborilishini e’lon qilgandi.