YeIga nomzodlarga Rossiyadagi paradga bormaslik kerakligi aytildi

Yevropa Ittifoqiga nomzod davlatlarga 9 may kuni Moskvada bo‘lib o‘tadigan harbiy paradga bormaslik kerakligi aytildi. Bu haqda 14 aprel, dushanba kuni Yevropa Ittifoqi tashqi ishlar vazirlarining Lyuksemburgdagi uchrashuvi boshlanishidan oldin Latviya tashqi ishlar vaziri Bayba Brajye ma’lum qildi.

«Kecha biz qizg‘in oqshomni o‘tkazdik — G‘arbiy Bolqondagi hamkorlar bilan kechki ovqat... Qadriyatlar, umumiy tashqi va xavfsizlik siyosatini muvofiqlashtirish, jumladan, sanksiyalar haqida ko‘p muhokamalar bo‘ldi. Jumladan, Yevropa Ittifoqiga a’zo davlatlarning nomzodlarga 9 may kuni Moskvadagi paradda qatnashmaslik, bunday safarga bormaslik to‘g‘risida juda aniq ko‘rsatmasi berildi, chunki bu YeI qadriyatlariga to‘g‘ri kelmaydi», dedi Brajye.

DW muxbiri xabar berishicha, buni Yevropa Ittifoqining tashqi ishlar va xavfsizlik siyosati bo‘yicha oliy vakili Kaya Kallas ham matbuot anjumanida tasdiqladi. «Biz nomzodlarga 9 may kuni Moskvada o‘tkaziladigan paradga bormasliklarini tushuntirdik», — dedi Kallas.

Polsha tashqi ishlar vaziri Radoslav Sikorskiy, o‘z navbatida, Ukraina tashqi ishlar vaziri Andrey Sibiga o‘zi va Kaya Kallas bilan kelishib, vazirlarni 9 may kuni Lvivdagi uchrashuvga taklif qilayotganini ma’lum qildi. "Menimcha, Yevropa yaqinda, Ukrainada ekanini ko‘rsatish uchun juda yaxshi g‘oya. Rossiya prezidenti Vladimir Putinning yonida Moskvada bo‘lish kerak emas. A’zo davlat yoki nomzod davlatning har qanday vakilining Moskvaga borishi bu davlat uchun yaxshi bo‘lmaydi", dedi u.