Moskva sudi «jurnalistlar ishi» bo‘yicha hukm chiqardi

Moskvaning Nagatinskiy tuman sudi jurnalistlar Antonina Favorskaya (Kravsova), Artem Kriger, shuningdek, avvalroq DW bilan hamkorlik qilgan Sergey Karelin va Konstantin Gabovlarni besh yarim yillik qamoq jazosiga hukm qildi, deb xabar berdi "Mediazona" nashri 15 aprel, seshanba kuni.

Tergov ma’lumotlariga ko‘ra, sudlanuvchilar Rossiyada «ekstremistik» deb tan olingan Korrupsiyaga qarshi kurash jamg‘armasi (FBK) faoliyatida qatnashgan. Ayblov tomoni jurnalistlarga 5 yil-u 11 oy qamoq jazosini so‘ragan. Sud majlisi yopiq eshiklar ortida o‘tdi.

«Siyosiy mahbuslarni qo‘llab-quvvatlash. Memorial» inson huquqlari loyihasi ayblanuvchilarni siyosiy mahbus deb tan oldi. Ishda ayblanuvchilar ayblovlarni rad etib, tashkilotda ishlamaganliklarini, balki uning faoliyatini jurnalist sifatida yoritganliklarini ta’kidladi.

«Novaya gazeta» Sergey Karelin, Konstantin Gabov va Artem Krigerning yakuniy bayonotlarining oldindan tayyorlangan matnlarini oldi. Nashr ularni chop etar ekan, jurnalistlar ustidan mahkama yopiq eshiklar ortida o‘tayotgani bois, ular aslida nima deyishgani ma’lum emasligini ta’kidlaydi. Sota Telegram-kanali tahririyat Antonina Favorskayaning yakuniy bayonoti yozilgan xatni senzuradan o‘tmagani uchun ololmaganini bildirdi.