Qozog‘istonda ota-onasi qaramog‘isiz qolgan bola O‘zbekistonga qaytarildi

Qozog‘istonda ota-onasi qaramog‘idan mahrum bo‘lgan voyaga yetmagan bola O‘zbekistonga qaytarildi, deb xabar beradi Ijtimoiy himoya milliy agentligi.

Qayd etilishicha, 21 aprel kuni voyaga yetmagan fuqaro Toshkent xalqaro aeroportida Ijtimoiy himoya milliy agentligi hamda Ichki ishlar vazirligining mas’ul xodimlari tomonidan kutib olingan. U o‘sha yerning o‘zida «Inson» markazi tomonidan unga vasiy etib tayinlangan yaqin qarindoshiga topshirilgan.

Ta’kidlanishicha, mazkur holatda «inson» ijtimoiy xizmatlar markazi voyaga yetmaganlarga ijtimoiy-psixologik yordam ko‘rsatadi, ularni jamiyatga moslashtirish va psixologik reabilitatsiyaga yo‘naltirilgan xizmatlar bilan ta’minlaydi.

Avvalroq Rossiyada qarovsiz qolib ketgan 16 nafar bola O‘zbekistonga qaytarilgani to‘g‘risida xabar berilgandi. Undan oldin esa Qozog‘istondan ota-ona qaramog‘isiz qolgan 10 nafar bola Toshkentga olib kelingan edi.