Qozog‘istonda pora berish niyati jinoyatga tenglashtirildi

Qozog‘iston prezidenti Qosim-Jo‘mart To‘qayev «Qozog‘iston Respublikasining ayrim qonun hujjatlariga korrupsiyaga qarshi kurashish masalalari bo‘yicha o‘zgartirish va qo‘shimchalar kiritish to‘g‘risida»gi qonunni imzoladi, deb xabar berdi Tengrinews.

Ta’kidlanishicha, qonun bilan manfaatlar to‘qnashuvining oldini olish va uni tartibga solish mexanizmi joriy etilmoqda, shuningdek, bunday to‘qnashuvning oldini olish va uni tartibga solish choralarini ko‘rmaganlik uchun javobgarlik mustahkamlanmoqda.

Bundan tashqari, hujjat davlat funksiyalarini bajarishga vakolatli shaxslarga tenglashtirilgan shaxslar doirasini kengaytiradi, yaqin qarindoshlar va boshqa aloqador shaxslarning birgalikdagi xizmati bilan bog‘liq cheklovlarni kuchaytiradi, shuningdek, davlat organlari va kvazidavlat sektori sub’yektlarida korrupsiyaga qarshi ichki nazorat tartibini modernizatsiya qiladi.

Xususan, davlat xizmatchilariga ishga qabul qilishda yaqin qarindoshlari haqidagi ma’lumotlarni oshkor qilish majburiyati yuklanadi.

Qonunning yana bir muhim yangiligi — pora berish niyatining o‘zini jinoyat deb topishdir. Ham og‘zaki, ham yozma shaklda, shu jumladan ijtimoiy tarmoqlardagi xabarlarda pora taklifi yoki va’dasi jinoiy ta’qibga dalil bo‘lib xizmat qilishi mumkin.