Rossiyada mushkul ahvolda qolgan O‘zbekiston fuqarolari vatanga qaytarildi

O‘zbekiston Bosh konsulxonasi diplomatlari Rossiyaning Novosibirsk shahrida mushkul ahvolda qolgan o‘zbekistonliklarning Toshkentga qaytishiga ko‘maklashdi.

Qayd etilishicha, Bosh konsulxona tomonidan O‘zbekiston fuqarosi M.T.ning Novosibirsk shahrida dunyoga kelgan qiz farzandi uchun tug‘ilganlik to‘g‘risidagi guvohnomani rasmiylashtirishda zarur yordam ko‘rsatilgan.

«Barcha rasmiyatchiliklar qisqa muddatda hal etildi va zarur hujjatlar yurtdoshimizga topshirildi», — deyiladi xabarda.

Ta’kidlanishicha, ona va bola 23 aprel kuni Novosibirsk—Toshkent aviareysi bilan O‘zbekistonga sog‘-salomat qaytgan.

Avvalroq Novosibirsk shahrida og‘ir hayotiy vaziyatga tushib qolgan voyaga yetmagan bola va uning ota-onasi O‘zbekiston Bosh konsulxonasi ko‘magida O‘zbekistonga kuzatib qo‘yilgani to‘g‘risida xabar berilgandi.