Turkiyalik erkak operatsiyadan keyin ona tilini unutib, boshqa tilda gapirishni boshladi

Turkiyaning Konya shahrida yashovchi Rahmi Karademir operatsiya va undan keyin kutilmaganda arteriyasi bekilib qolishi oqibatida ona tilini unutib, faqat dan tilida gapirishni boshladi. Bu haqda shifokorlarga tayanib Anadolu agentligi xabar berdi.

Karademirning tizzasi o‘tgan hafta operatsiya qilingan. Ikki kundan keyin uning o‘ng qo‘l va oyog‘i falajlangan, shuningdek, u tildan qolgan. Shifokorlar tekshiruvidan keyin uning miya arteriyasi bekilib qolgani aniqlangan. Quyulib qolgan qon olib tashlangan va bemorning ahvoli yaxshilana boshlagan. Ammo shundan keyin u faqat dan tilida gapirishni boshlagan, turk tilida esa birorta ham so‘zni talaffuz qila olmagan.

Erkak uzoq yillar — qariyb 20 yil Daniyada yashagan, oxirgi 10 yildan beri Turkiyada istiqomat qilib keladi.

Selchuk universiteti shikofori Gekxan Ozdemirning tushuntirishicha, tibbiyotda bu kabi holatlar kuzatilgan, ammo juda kamdan kam holatda uchrab turadi. Uning so‘zlariga ko‘ra, insult yoki trombozdan keyin bemorlar ba’zida tillardan birini unutadi yoki anchadan beri foydalanmay kelgan tilida gapirishni boshlaydi.

Mutaxassislarning hisoblashicha, bemor yaqin vaqtlar ichida turkcha nutqini tiklashi mumkin. Karademirning o‘zi tarjimon orqali turk tilini tushunayotgani, ammo hech narsa deya olmayotganini aytgan.