Ruminiyadagi saylovlarning birinchi bosqichida o‘ta o‘ng siyosatchi g‘alaba qozondi

Ruminiyada 5 may kuni bo‘lib o‘tgan takroriy prezidentlik saylovlarining birinchi bosqichida «Ruminlarni birlashtirish uchun ittifoq» rumin millatchi partiyasi yetakchisi Jorjye Simion g‘alaba qozondi. Markaziy saylov komissiyasi ma’lumotlariga ko‘ra, byulletenlarning 99,8 foizi sanab chiqilgach, u 40,85 foiz ovoz to‘plagan. Siyosatchi mutlaq ko‘pchilikni qo‘lga kirita olmadi, shuning uchun saylovning ikkinchi bosqichi bo‘lib o‘tadi.

Simionning raqibi o‘ng markazchi «Ruminiyani qutqarish ittifoqi»ning asoschisi, 20,96 foiz ovoz olgan Buxarest general meri Nikushor Dan bo‘ladi.

Birinchi turda uchinchi o‘rin 20,15 foiz ovoz olgan «Ruminiya, oldinga» markazchilar alyansi tomonidan qo‘llab-quvvatlangan Krin Antoneskuga nasib etdi. U ikkinchi bosqichga chiqa olmadi.

Mamlakat Markaziy saylov komissiyasi ma’lumotlariga ko‘ra, birinchi turda 9,57 millionga yaqin kishi yoki ovoz berish huquqiga ega Ruminiya fuqarolari umumiy sonining 53,2 foizi ovoz bergan. Xorijdagi saylov uchastkalarida 973 ming kishi ovoz berdi.

4 may kuni Simion agar u takroriy prezidentlik saylovlarida g‘alaba qozonsa, avvalgi saylovlarning birinchi bosqichida g‘alaba qozongan hokimiyatdan chetlatilgan o‘ta o‘ng siyosatchi Kalin Jorjyesku hokimiyatga qaytishi mumkinligini aytdi, biroq uning natijasi bekor qilindi.