Ruminiya 298 ta Lynx jangovar mashinasini xarid qiladi

Germaniyaning Rheinmetall mudofaa konserni Ruminiya hukumati bilan umumiy qiymati 5,7 milliard yevro bo‘lgan yirik harbiy shartnoma imzolaganini ma’lum qildi.

Shartnomaga muvofiq, Ruminiyaga 298 ta Lynx jangovar mashinasi, Skyranger havo mudofaasi tizimlari, turli xil o‘q-dorilar hamda to‘rtta harbiy kater yetkazib beriladi.

Kompaniya mazkur kelishuvni o‘zining so‘nggi tarixidagi eng yirik xalqaro buyurtma deb atadi. Rheinmetall ma’lumotiga ko‘ra, ilk yetkazib berish ishlari 2028 yilda boshlanib, 2030 yilgacha yakunlanadi.

Shuningdek, konsern Ruminiyada o‘z ishlab chiqarish quvvatlarini tashkil etishni va mamlakat mudofaa sanoatiga bir necha yuz million yevro investitsiya kiritishni rejalashtirmoqda.

Rheinmetall bosh direktori Armin Papperger bu kelishuvga ishorani 2026 yil mart oyidayoq bergan edi. Kompaniyaning investorlar uchun taqdim etgan prognozlarida Ruminiya Ukraina va Italiya bilan bir qatorda asosiy qurol-yarog‘ xaridorlaridan biri sifatida qayd etilgan.

Ruminiya mazkur bitimni Yevropa Ittifoqining Security Action for Europe (SAFE) dasturi mablag‘lari hisobidan moliyalashtirishni rejalashtirmoqda. Dastur YeI davlatlarining mudofaa salohiyatini kuchaytirish, qurol-yarog‘ xarid qilish va mudofaa sanoatini rivojlantirishga qaratilgan.

2025 yil may oyida tashkil etilgan SAFE jamg‘armasi doirasida ishtirokchi davlatlarga imtiyozli kreditlar shaklida jami 150 milliard yevro ajratilishi ko‘zda tutilgan. Dasturning asosiy maqsadlari qatorida Yevropa mudofaasini mustahkamlash, AQShga qaramlikni qisqartirish va Ukrainaga ko‘mak berish ham bor.