Britaniya birinchi bo‘lib AQSh bilan «savdo bitimi» tuzdi

AQSh prezidenti Donald Tramp «Truth» ijtimoiy tarmog‘idagi sahifasida Buyuk Britaniya bilan savdo masalalari bo‘yicha kelishuvga erishganini e’lon qildi.

U kelishuvni «to‘liq va keng qamrovli» deb ta’rifladi, aniq tafsilotlar hozircha oshkor etilmadi. Bu Tramp o‘nlab mamlakatlarga qarshi boshlagan savdo urushi davridagi birinchi bitim hisblanadi.

BBC nashrining qayd etishicha, Britaniya hukumati AQSh yangi ma’muriyati bilan kelishuvga erishgan birinchi davlat sifatida ma’lum imij imtiyozlarini oladi, garchi bu natijaga nima evaziga erishilgani noma’lumligicha qolmoqda.

Yangi shartlar Britaniya tomoni uchun avvalgi holatga nisbatan qanchalik foydali bo‘lishi hozircha noma’lum. Oq uy avvalroq Britaniyaning barcha tovarlariga 10 foizlik, avtomobillar va po‘latga esa 25 foizlik boj joriy etgan edi. Ushbu tariflar Britaniya mahsulotlarini qimmatlashtiradi va AQShda ularga bo‘lgan talabni kamaytiradi.

BBC nashrining ta’kidlashicha, London bilan e’lon qilingan kelishuvga qaramay, moliyaviy bozorlarda keskinlik saqlanib qolmoqda, chunki AQSh asosiy savdo sherigi Xitoy bilan muzokaralar endi boshlanmoqda va qiyin bo‘lishi va’da qilinmoqda.