Samarqand va Tel-Aviv o‘rtasida to‘g‘ridan to‘g‘ri aviaqatnovlar yo‘lga qo‘yildi

Air Samarkand aviakompaniyasi Samarqand va Tel-Aviv yo‘nalishidagi ilk to‘g‘ridan to‘g‘ri havo qatnovlarini amalga oshirdi.

Shu tariqa, Air Samarkand Isroilga parvozlarni amalga oshirayotgan to‘rtinchi O‘zbekiston aviakompaniyasiga aylandi. Jumladan, ushbu yo‘nalishda Uzbekistan Airways, Qanot Sharq va Centrum Air kompaniyalari o‘z qatnovlarini amalga oshiradi.

Tel-Avivdagi "Ben-Gurion" aeroportida mazkur yo‘nalishda parvoz qilgan yo‘lovchilarni kutib olish marosimi bo‘lib o‘tdi. Tadbirda Air Samarkand aviakompaniyasining Isroildagi vakili va Asia Travel turistik kompaniyasi asoschisi Nissan Mushayev so‘zga chiqdi.

Air Samarkand aviakompaniyasi mazkur yo‘nalishda qatnovlarni dastlabki bosqichda haftada bir marta – har yakshanba kunlari amalga oshiradi. Shu yilning 10 iyul sanasidan boshlab esa har payshanba kuni qo‘shimcha reys yo‘lga qo‘yilishi rejalashtirilmoqda.

#Samarqand #Tel-Aviv #aviaqatnov