Qozog‘istonda davlat xizmatchilariga ChatGPT’dan foydalanish taqiqlandi

Qozog‘iston raqamli rivojlanish, innovatsiyalar va aerokosmik sanoat vaziri o‘rinbosari Kanish Tuleushin mamlakatdagi davlat xizmatchilariga ChatGPT’dan foydalanish taqiqlanganini ma’lum qildi.

Uning so‘zlariga ko‘ra, xizmat maqsadlarida, ayniqsa, «XDFU» formatidagi hujjatlar bilan ishlashda ChatGPT’dan foydalanishni taqiqlash bo‘yicha raqamli rivojlanish vazirining buyrug‘i chiqqan. Shuningdek, vazir o‘rinbosari cheklovlar bilan masala hal bo‘lmasligi, shuning uchun muqobil yechim — mahalliy neyrotarmoq taklif qilinganini ta’kidladi.

«Agar kimdir ish samaradorligini oshirish uchun til modelidan foydalanishni istasa, unda o‘z olimlarimiz tomonidan ishlab chiqilgan muqobil yechim bo‘ladi. Bizning katta til modelimiz serverlarimizda yopiq zanjirda», — deydi Tuleushin.

Vazir o‘rinbosari bunday chora-tadbirlar ma’lumotlar sizib chiqishining oldini olish maqsadida amalga oshirilayotganini ta’kidladi. Ammo hozircha bajarilgan biror ish qaysi neyrotarmoq orqali bajarilganini tekshirishning imkoni yo‘q. Tuleushinning so‘zlariga ko‘ra, ayni vaqtda istalgan fuqaro har qanday neyrotarmoqdan foydalanishi mumkin.