Assystem «O‘zatom»ga AES loyihasini texnik qo‘llab-quvvatlashda yordam beradi

«O‘zatom» agentligi va Fransiyaning Assystem kompaniyasi o‘zaro hamkorlikda qo‘shma korxona tashkil etishni nazarda tutuvchi anglashuv memorandumini (dastlabki shartlar) imzoladi.

Foto: O‘zatom

Toshkentda o‘tkazilgan uchrashuvda «O‘zatom» agentligi rahbari Azim Ahmadxo‘jayev va Assystem xalqaro masalalar bo‘yicha bosh vitse-prezidenti Kristian Janno atom energetikasi va ilg‘or texnologiyalarni rivojlantirishga qaratilgan o‘zaro manfaatli hamkorlik va strategik sheriklik imkoniyatlarini muhokama qildi.

Qo‘shma korxona faoliyati AES qurilishi loyihasini texnik qo‘llab-quvvatlash, texnik yechimlarni tanlash va ularni yagona konsepsiyaga birlashtirishda ko‘maklashish, shuningdek, O‘zbekiston fuqarolik yadro dasturini rivojlantirishga oid loyihalarni qo‘llab-quvvatlashni o‘z ichiga qamrab oladi.

Assystem Parijda joylashgan mustaqil muhandislik guruhi. U asosan atom sohasida murakkab loyihalar va sanoat infratuzilmasini loyihalash, qurish, nazorat qilish, ishga tushirish bo‘yicha xizmatlar ko‘rsatadi. Ushbu tashkilot turli xil reaktor texnologiyalaridan foydalangan holda deyarli barcha yirik xalqaro yadroviy loyihalarda faol ishtirok etib kelmoqda.

#Fransiya #AES #O‘zatom