Fransiyada o‘rmon yong‘ini: mingga yaqin kishi evakuatsiya qilindi

Fransiyaning Parij shahri yaqinida joylashgan Fontenblo o‘rmonida yuz bergan yirik yong‘in yuzasidan ikki nafar shaxs qo‘lga olindi. Huquqni muhofaza qiluvchi organlar ularni yong‘inga qasddan yoki ehtiyotsizlik oqibatida sababchi bo‘lganlikda gumon qilmoqda. Tabiiy ofat oqibatida 1300 gektardan ortiq o‘rmon maydoni yonib ketdi, mingga yaqin aholi xavfsiz hududlarga evakuatsiya qilindi.

Foto: REUTERS

Fransiya ichki ishlar vaziri Loran Nunesning ma’lum qilishicha, qo‘lga olingan ikki shaxsga nisbatan «qasddan yoki ehtiyotsizlik bilan yong‘in keltirib chiqarish» moddalari bo‘yicha tergov olib borilmoqda.

Tergov ma’lumotlariga ko‘ra, gumonlanuvchilardan biri 18 yoshli yigit bo‘lib, u avval sudlanmagan. Uni ushlash vaqtida qo‘llari qurum bilan qoplangani, yonidan esa yondirgich (zajigalka) topilgani aytilmoqda.

Mahalliy hokimiyat ma’lumotiga ko‘ra, bu Parij atrofidagi so‘nggi yillardagi eng yirik o‘rmon yong‘inlaridan biri hisoblanadi. Tabiiy ofat natijasida 1300 gektardan ziyod o‘rmon maydoni yongan, taxminan ming nafar kishi xavfsiz joylarga evakuatsiya qilingan.

Yong‘inni bartaraf etish ishlariga 600 nafar o‘t o‘chiruvchi jalb qilingan. Shuningdek, maxsus aviatsiya ham ishga tushirilib, to‘rtta Canadair samolyoti, ikkita Dash samolyoti va uchta vertolyot yordamida yong‘in o‘chirilgan. Qutqaruv operatsiyasi rahbari Jan-Mark Sikarning ma’lum qilishicha, havodan jami 187 marta suv tashlangan.

Kechki vaqtga kelib ham yuzlab o‘t o‘chiruvchilar yong‘in o‘chog‘ida navbatchilikni davom ettirgan. Yong‘in tufayli bir nechta avtomobil yo‘llari vaqtincha yopilgan.

Mutaxassislar ta’kidlashicha, Fransiya joriy yil boshidan buyon uchinchi issiqlik to‘lqinini boshdan kechirmoqda. Mamlakatda yil boshidan buyon o‘rmon yong‘inlari 32 ming gektar yer maydoniga zarar yetkazgan bo‘lib, bu o‘tgan yilning shu davriga nisbatan qariyb ikki baravar ko‘pdir.

Fransiya huquqni muhofaza qiluvchi organlari shu vaqtga qadar qasddan o‘t qo‘yish yoki ehtiyotsizlik bilan yong‘in keltirib chiqarishda gumon qilinib, 59 nafar shaxsni qo‘lga olgan. Ular orasida o‘chirilmagan sigareta qoldig‘ini tashlab ketish orqali yong‘inga sabab bo‘lganlar ham bor.

Shu bilan birga, Yevropaning Copernicus iqlim xizmati ma’lumotiga ko‘ra, 2026 yil iyun oyi G‘arbiy Yevropa kuzatuvlari tarixidagi eng issiq iyun sifatida qayd etildi. Germaniyada esa Robert Kox institutining dastlabki hisob-kitoblariga ko‘ra, iyun oyidagi kuchli issiqlik to‘lqini oqibatida taxminan 5100 kishi vafot etgan.