Surxondaryo viloyati FVBga yangi boshliq tayinlandi

Favqulodda vaziyatlar vazirining tegishli buyrug‘i bilan Sharof Shukurov Surxondaryo viloyati Favqulodda vaziyatlar boshqarmasi boshlig‘i lavozimiga tayinlandi. Bu haqda viloyat hokimligi matbuot xizmati xabar berdi.

Sharof Shukurov 1979 yilda Jizzax shahrida tug‘ilgan. 2000 yilda Ichki ishlar vazirligi Yong‘indan saqlash oliy texnik maktabining bakalavr darajasini, 2005 yilda shu oliy maktabning magistr darajasini tamomlagan. Ma’lumoti bo‘yicha mutaxassisligi – hayotiy faoliyat xavfsizligi, tezkor xizmat faoliyatini tashkillashtirish.

Mehnat faoliyati davomida Jizzax va Surxondaryo viloyati Favqulodda vaziyatlar boshqarmalarida turli lavozimlarda mehnat qilgan.

Tayinlovga qadar 2022 yildan buyon Jizzax viloyati Favqulodda vaziyatlar boshqarmasi boshlig‘ining birinchi o‘rinbosari – Shtab boshlig‘i lavozimida faoliyat yuritib kelayotgan edi.

Eslatib o‘tamiz, o‘tgan yilning aprelida beri polkovnik Ilhom Ismoilzoda Surxondaryo viloyati FVB rahbari lavozimida ishlab kelayotgan edi.