Polsha snaryad ishlab chiqarishni 5 baravarga oshiradi

Polshaning PGZ davlat mudofaa konserni artilleriya snaryadlarini ishlab chiqarishni besh baravarga — yiliga 180 mingtagacha oshirish niyatida. Bu haqda davlat aktivlari vaziri Yakub Yavorovskiy ma’lum qildi.

Uning so‘zlariga ko‘ra, Polsha import qurollariga bo‘lgan qaramlikni qisqartirish va o‘zini Rossiya tahdidlaridan himoya qilish maqsadida gaubitsalar uchun snaryadlar ishlab chiqarishni besh baravarga oshiradi.

«Bizning qisqa muddatli maqsadimiz — bu turdagi qurollarni ishlab chiqarishni sezilarli darajada oshirish va chet ellik yetkazib beruvchilardan mustaqil bo‘lish, milliy avtonomiya uchun barqaror asos yaratish», — deydi Yavorovskiy.

PGZ snaryadlar ishlab chiqarishni ko‘paytirish uchun yaqin kunlarda 663 million dollar oladi. Qo‘shimcha sarmoya kiritilishi 155 va 120 millimetrli snaryadlar ishlab chiqarish hajmini oshirishga xizmat qiladi.

PGZ hozirda yiliga yirik kalibrli snaryadlardan 30 mingta ishlab chiqaradi, ammo uch yil ichida ushbu ko‘rsatkichni 150—180 mingga yetkazishni rejalashtirmoqda.

Financial Times’ning yozishicha, Polsha NATO davlatlari orasida mudofaa uchun eng ko‘p mablag‘ sarflamoqda: 2025 yilda ushbu mudofaa xarajatlari uchun YaIMning 4,7 foizini yo‘naltiriladi. Ammo mablag‘larning aksariyati chet ellik yetkazib beruvchilarga, asosan AQSh va Janubiy Koreyaga chiqib ketadi. Endi Polsha hukumati milliy ishlab chiqarishni qo‘llab-quvvatlashga e’tibor qaratmoqchi.