Isroilning G‘azoga zarbalari: 10 nafar falastinlik halok bo‘ldi

G‘azo sektoridagi sog‘liqni saqlash manbalarining ma’lum qilishicha, Isroilning ertalab boshlangan qator hujumlarida kamida 10 nafar falastinlik, jumladan gumanitar yordam kutayotgan tinch aholi ham halok bo‘ldi.

Isroil kuchlari G‘azo shahri janubi-g‘arbida, odamlar gumanitar yordam kelishini kutayotgan Netsarim yo‘lagi hududini o‘qqa tutishi oqibatida 3 nafar falastinlik halok bo‘ldi, 15 dan ortig‘i yaralandi. Yaradorlar shahar janubidagi Al-Quds kasalxonasiga yetkazildi.

Sektor markazidagi Vadi G‘azo hududidagi Salah al-Din ko‘chasida to‘plangan tinch aholiga uyushtirilgan hujumda yana bir falastinlik halok bo‘ldi, 50 nafari yaralandi, jumladan, o‘n nafari og‘ir ahvolda. Hodisa Nuseyrat qochqinlar lageri yaqinida sodir bo‘lgan, deya xabar beradi "Al-Auda" kasalxonasi.

Shuningdek, G‘azo sektori markazida joylashgan al-Zavayda hududidagi turar joy binosiga uyushtirilgan hujum oqibatida olti kishi halok bo‘ldi.

Guvohlarning so‘zlariga ko‘ra, Isroil qo‘shinlari Xon-Yunus sharqidagi Al-Qarara hududida uylarni portlatib yuborgan, G‘azo shahri sharqidagi aholi turar joylariga havo hujumlarini, artilleriyadan o‘qqa tutishni va hujumlarni kuchaytirgan.

Isroil tinch aholi orasida qurbonlar soni ortib borayotganiga qaramay, sektorda keng ko‘lamli harbiy amaliyotlar o‘tkazishda davom etmoqda.