Turkiyada oqsim kasalligi tarqaldi

Turkiyada hayvonlar orasida o‘ta xavfli oqsim kasalligi epidemiyasi qayd etildi, deb xabar berdi Ihlas Haber.

Qayd qilinishicha, Qurbon hayiti nishonlangandan so‘ng, hayvonlar orasida kasallik holatlari keskin oshgan. Qishloq xo‘jaligi vazirligi mamlakatning 81 viloyatiga favqulodda xabarnoma yuborgan. Oqibatda Turkiya barcha chorva bozorlarini vaqtincha yopib, epidemiologik xavfli hududlarda karantin joriy qilgan.

Oqsim epidemiyasi sayyohlar uchun yangi ogohlantirishlarga sabab bo‘ldi.

Oqsim – tuyoqli hayvonlarning (qoramol, qo‘y, echki, cho‘chqa) o‘tkir va o‘ta yuqumli virusli kasalligidir. Unga pikornavirus sabab bo‘ladi.

Yuqumli kasalliklar bo‘yicha mutaxassislarning ta’kidlashicha, oqsim kasalligi virusi odamdan odamga yuqmaydi. Infeksiyaning asosiy tarqalish yo‘li kasal hayvon bilan aloqa qilish yoki xom sut va qayta ishlanmagan go‘shtni iste’mol qilishdir. Shu bilan birga, virus issiqlik bilan ishlov berish va ultrabinafsha nurlar ta’sirida tezda yo‘q qilinadi.

Kasallik profilaktikasi – hayvonlarni emlash, karantin va dezinfeksiya hisoblanadi.