Tramp soliqlar to‘g‘risidagi «katta ajoyib» qonun loyihasini imzoladi

AQSh prezidenti Donald Tramp 4 iyul, juma kuni kechqurun soliqlarni kamaytirish va AQSh davlat qarzining chegarasini 4 trillion dollardan ortiqroqqa oshirish mumkinligi haqidagi «katta ajoyib» qonun loyihasini imzoladi. «Bu yaxshi», — deya o‘z xatti-harakatlarini izohladi u hujjatni Oq uyda o‘nlab respublikachi qonunchilar qurshovida marker bilan imzolab.

«Amerika g‘alaba qozonmoqda, g‘alaba qozonmoqda, hech qachon bo‘lmaganidek g‘alaba qozonmoqda», — deya qo‘shimcha qildi Tramp hujjatni imzolaganidan so‘ng AQSh Mustaqillik kuniga bag‘ishlangan marosimni yakunlab. Yaqinda Eron yadro inshootlarini bombardimon qilgan uchuvchilar tadbirga taklif etilganlar orasida edi, deb xabar beradi AFP.

AQSh Kongressining vakillar palatasi Senat tomonidan ma’qullanganidan ko‘p o‘tmay, 3 iyul kuni prezident tomonidan ilgari surilgan «katta ajoyib» qonun loyihasini ma’qulladi. Hujjat kam farq bilan qo‘llab-quvvatlandi: 218 kongressmen «yoqlab», 214 nafari qarshi chiqdi.

Qonun loyihasi soliqlarni pasaytirish, immigratsiya xizmatlarini moliyalashtirishni oshirish va kambag‘allar, nogironlar, kam ta’minlangan oilalar farzandlari va boshqa ijtimoiy himoyaga muhtoj shaxslarning tibbiy xarajatlarini to‘lashga yordam beradigan Medicaid dasturiga xarajatlarni kamaytirishni nazarda tutadi. Shu bilan birga, u mudofaa sohasiga, xususan, «Oltin gumbaz» raketalarga qarshi mudofaa tizimini rivojlantirishga sarflanadigan xarajatlarni oshirishni nazarda tutadi.

Tashabbusning eng ashaddiy muxoliflaridan biri milliarder va Tesla asoschilaridan biri Ilon Mask bo‘lib, u Trampning qonun loyihasi mamlakat aholisini qarz chuqurligiga olib kelishini da’vo qilmoqda. Maskning hujjatni tanqid qilishi tadbirkor va davlat rahbari o‘rtasida janjal va haqorat almashinuviga sabab bo‘ldi.