Isroil HAMASni o‘t ochishni to‘xtatish taklifini o‘zgartirishga urinishda aybladi

Isroil HAMASni Qatarning G‘azo sektorida o‘t ochishni to‘xtatish haqidagi taklifini o‘zgartirishga urinayotganlikda ayblab, o‘zgarishlarni qabul qilib bo‘lmas deb atadi.

Isroil bosh vaziri kanselyariyasi tomonidan e’lon qilingan bayonotda HAMASning Qatar vositachilari tomonidan ilgari taqdim etilgan kelishuv loyihasiga o‘zgartirish kiritish bo‘yicha takliflari Isroil tomoniga topshirilgani qayd etildi.

«HAMASning Qatar taklifiga kiritmoqchi bo‘lgan o‘zgarishlari Isroil uchun qabul qilinishi mumkin emas», — deyiladi bayonotda.

Isroil bosh vaziri Binyamin Netanyahu, Isroil tomoni ma’qullagan taklif shartlariga ko‘ra, G‘azoda saqlanayotgan asirlarni ozod qilish uchun bilvosita muzokaralar va sa’y-harakatlarni davom ettirishga ko‘rsatma bergani ta’kidlandi.

Isroilning muzokaralar guruhi yaqin orada sulh bitimi bo‘yicha maslahatlashuvlarning navbatdagi bosqichida ishtirok etish uchun Qatarga borishi kutilmoqda.

O‘tgan hafta HAMAS harakati vositachilarga Isroil bilan o‘t ochishni to‘xtatish taklifiga ijobiy munosabatda ekanini bildirdi va o‘t ochishni to‘xtatish hamda asirlar almashish kelishuvini amalga oshirish maqsadida muzokaralarga tayyorligini ta’kidladi.