Google sun’iy intellekti «barcha kasalliklar muammosini hal qiladi»

Alphabet korporatsiyasi tarkibiga kiruvchi Isomorphic Labs kompaniyasi sun’iy intellekt (SI) yordamida yaratilgan saratonga qarshi dorining birinchi klinik sinovlarini boshlashga tayyorlanmoqda. Kompaniyaning ulkan maqsadi - «barcha kasalliklar muammosini hal qilish».

Isomorphic Labs kompaniyasi Google DeepMind sun’iy intellekti muvaffaqiyati asosida tashkil etilgan. Ushbu sun’iy intellekt inson organizmidagi oqsillar shaklini aniq bashorat qila oladi - bu yangi dori vositalarini yaratishdagi hal qiluvchi qadamdir.

Odatda bir dorini ishlab chiqish 10-15 yil davom etadi va milliardlab dollarga tushadi. Isomorphic Labs kompaniyasi AlphaFold 3 yordamida jarayonni tezlashtirishni va’da qilmoqda, bu esa laboratoriya tadqiqotlari boshlanishidan oldin ham dori vositalarini raqamli «loyihalash»ga yordam beradi.

Kompaniya allaqachon Novartis va Eli Lilly farmatsevtika gigantlari bilan yirik shartnomalar tuzdi va o‘z dori vositalarini yaratish uchun 600 million dollar to‘pladi.

Biroq, bu muvaffaqiyatlar savollar tug‘diradi. Bunday dorilar hamyonbop bo‘ladimi? Agar SI xato qilsa, kim javobgar bo‘ladi? Bu savollarning barchasi hozircha ochiqligicha qolmoqda.