Rahbar kadrlar sun’iy intellekt asosida saralanadi

Bu haqda prezident Shavkat Mirziyoyevga iqtidorli boshqaruvchilar, liderlar va yangi avlod rahbarlarini aniqlash hamda tayyorlashga qaratilgan takliflar taqdim etildi.

Taqdimotda qayd etilishicha, O‘zbekiston intellektual salohiyat va yuqori texnologiyalarga asoslangan yangi rivojlanish bosqichiga qadam qo‘ymoqda. Mamlakatga har yili 50 milliard dollardan ziyod investitsiyalar jalb qilinishi, eksport hajmining 40 milliard dollarga yaqinlashishi hamda yangi zamonaviy korxonalarning ishga tushirilishi malakali boshqaruv kadrlariga bo‘lgan ehtiyojni oshirmoqda.

Sun’iy intellekt yordamida tarmoqlar va hududlar tahlil qilinib, 50 dan ortiq zamonaviy kasb bo‘yicha boshqaruv kadrlariga ehtiyoj mavjudligi aniqlangan. Energetika va «yashil» texnologiyalar, qurilish va urbanizatsiya, qishloq va suv xo‘jaligi, raqamlashtirish hamda xizmat ko‘rsatish sohalarida yuqori malakali mutaxassislarga talab yuqori ekani ta’kidlandi.

Prezident kadrlarni baholashda an’anaviy «obektivka» usulidan voz kechib, nomzodning bilimi, kasbiy tajribasi, psixologik xususiyatlari, strategik fikrlashi va liderlik salohiyatini qamrab oladigan portfolio tizimiga o‘tish zarurligini qayd etdi.

Yangi tizimga muvofiq, katta ma’lumotlar (Big Data) va biznes-tahlil vositalari orqali yuqori salohiyatli kadrlar aniqlanadi. Ular uchun sun’iy intellekt yordamida shaxsiy kasbiy rivojlanish dasturlari ishlab chiqiladi. Mazkur mexanizm dastlab qishloq xo‘jaligi, oliy ta’lim va qurilish sohalarida sinov tariqasida joriy etilishi rejalashtirilgan.

Shuningdek, har ikki yilda 500 nafar istiqbolli boshqaruvchini saralab olish va 2030 yilga qadar 1,5 ming nafar yuqori salohiyatli mutaxassisdan iborat milliy rahbar kadrlar zaxirasini shakllantirish rejalashtirilmoqda.

Taqdimotda rahbarlik lavozimlari uchun milliy kadrlar zaxirasini shakllantirish maqsadida «Top-100» ochiq tanlovini yo‘lga qo‘yish taklifi ham bildirildi. Tanlov g‘oliblari maxsus o‘quv dasturlari asosida tayyorlanib, ularning rahbarlik lavozimlariga tayinlanishi va kasbiy o‘sishi uchun manzilli choralar ko‘riladi.

Yig‘ilishda, shuningdek, «El-yurt umidi» jamg‘armasi faoliyatini takomillashtirish, xorijda tahsil olayotgan iqtidorli yoshlarni qo‘llab-quvvatlash va ularning salohiyatidan mamlakat taraqqiyoti yo‘lida samarali foydalanish masalalari ham muhokama qilindi. Prezident mutasaddilarga kadrlarni saralashda ochiqlik va xolislikni ta’minlash hamda iqtidorli mutaxassislarni tizimli qo‘llab-quvvatlash yuzasidan tegishli topshiriqlar berdi.