Ukrainada korrupsiyaga qarshi kurash idoralariga mustaqillik qaytarildi

Ukraina Oliy Radasi Korrupsiyaga qarshi kurashish milliy byurosi (NABU) va Ixtisoslashtirilgan antikorrupsiya pokuraturasi (SAP) vakolatlarini tiklovchi qonunni qabul qildi.

Hujjatni 331 nafar deputat yoqladi. Oliy Rada yig‘ilishi Rossiya-Ukraina urushi boshlanganidan beri birinchi marta onlayn translatsiya qilindi. Ilgari xavfsizlik nuqtai nazaridan jonli efir taqiqlangan edi.

Prezident Zelenskiy Rada deputatlariga NABU va SAP vakolatlarini tiklash to‘g‘risidagi qonunni qabul qilgani uchun minnatdorchilik bildirdi va bu qonunni allaqachon imzolaganini ma’lum qildi.

Bunday tezkorlik Yevropa Ittifoqi tomonidan muzlatilgan moliyalashtirishning tiklanishi, shuningdan G‘arb va mamlakat ichidagi tanqidlarni tinchlantirish bilan izohlanishi mumkin.

22 iyul kuni Oliy Rada NABU va SAP idoralarini mustaqillikdan mahrum qilgan 12414-sonli qonun loyihasini qabul qildi. Zelenskiy qonunni imzoladi. Shu sababli Ukrainada norozilik namoyishlari boshlandi, hujjatdan Kiyevning yevropalik hamkorlari ham norozilik bildirdi.

Oradan ikki kun o‘tib, 24 iyul kuni Ukraina prezidenti Radaga «korrupsiyaga qarshi organlar vakolatlarini qisqartirishni bekor qiluvchi» 13533-sonli yangi qonun loyihasini kiritdi.

Yangi qonun nazoratni bosh prokurorga o‘tkazish to‘g‘risidagi avvalgi qarorni bekor qilish orqali NABU va SAP mustaqilligini kafolatlaydi. Biroq, Rossiya ta’sirini to‘xtatish uchun byuro detektivlarini poligrafda tekshirish imkoniyati saqlanib qolmoqda: Ukraina Xavfsizlik xizmati 21 iyul kuni NABUdagi keng ko‘lamli tintuvlarni aynan shunday ta’sirga qarshi kurash bilan izohlagan edi.