Украинада коррупцияга қарши кураш идораларига мустақиллик қайтарилди

Украина Олий Радаси Коррупцияга қарши курашиш миллий бюроси (НАБУ) ва Ихтисослаштирилган антикоррупция покуратураси (САП) ваколатларини тикловчи қонунни қабул қилди.

Ҳужжатни 331 нафар депутат ёқлади. Олий Рада йиғилиши Россия-Украина уруши бошланганидан бери биринчи марта онлайн трансляция қилинди. Илгари хавфсизлик нуқтаи назаридан жонли эфир тақиқланган эди.

Президент Зеленский Рада депутатларига НАБУ ва САП ваколатларини тиклаш тўғрисидаги қонунни қабул қилгани учун миннатдорчилик билдирди ва бу қонунни аллақачон имзолаганини маълум қилди.

Бундай тезкорлик Европа Иттифоқи томонидан музлатилган молиялаштиришнинг тикланиши, шунингдан Ғарб ва мамлакат ичидаги танқидларни тинчлантириш билан изоҳланиши мумкин.

22 июл куни Олий Рада НАБУ ва САП идораларини мустақилликдан маҳрум қилган 12414-сонли қонун лойиҳасини қабул қилди. Зеленский қонунни имзолади. Шу сабабли Украинада норозилик намойишлари бошланди, ҳужжатдан Киевнинг европалик ҳамкорлари ҳам норозилик билдирди.

Орадан икки кун ўтиб, 24 июл куни Украина президенти Радага «коррупцияга қарши органлар ваколатларини қисқартиришни бекор қилувчи» 13533-сонли янги қонун лойиҳасини киритди.

Янги қонун назоратни бош прокурорга ўтказиш тўғрисидаги аввалги қарорни бекор қилиш орқали НАБУ ва САП мустақиллигини кафолатлайди. Бироқ, Россия таъсирини тўхтатиш учун бюро детективларини полиграфда текшириш имконияти сақланиб қолмоқда: Украина Хавфсизлик хизмати 21 июл куни НАБУдаги кенг кўламли тинтувларни айнан шундай таъсирга қарши кураш билан изоҳлаган эди.