Vadeful isroillik ko‘chmanchilarning falastinliklarga nisbatan zo‘ravonligini qoraladi

Germaniya tashqi ishlar vaziri Yoxann Vadeful isroillik ko‘chmanchilarning G‘arbiy sohilda yashovchi falastinliklarga nisbatan kuchaygan zo‘ravonligini qoraladi. «Bunday harakatlar jinoyat, terror va ular politsiya tomonidan ta’qib qilinishi kerak», dedi siyosatchi Falastinning Taybe qishlog‘iga tashrifi chog‘ida. Vadefulning tashrifi «ko‘chmanchilar zo‘ravonligidan aziyat chekayotgan barcha odamlar bilan birdamlik belgisi» bo‘lishi kerak edi.

Shuningdek, tashqi ishlar vaziri Isroil mintaqani nazorat qiluvchi davlat va huquqiy davlat sifatida «xavfsizlik va tartibni ta’minlashi, jinoyatchilarni jazolashi» kerakligini aytdi. «U Falastin aholisini bu jinoyatchilardan himoya qilishi kerak», — deya qo‘shimcha qildi Vadeful. Siyosatchiga ko‘ra, Germaniya hukumati Yevropa darajasida zo‘ravon ko‘chmanchilarga qarshi sanksiyalar qo‘llash tarafdori.

1967 yildan so‘ng Iordan daryosining G‘arbiy sohilida Isroil aholi punktlari paydo bo‘la boshladi. BMT Bosh Assambleyasining majburiy bo‘lmagan 181-sonli rezolyutsiyasiga ko‘ra, arab davlatini yaratish mo‘ljallangan edi. Olti kunlik urush paytida isroilliklar ushbu hudud, shuningdek, Sharqiy Quddus va G‘azo sektori ustidan nazoratni qo‘lga kiritdi.

Bir qator davlatlar va BMT Isroilning harakatlarini bosqinchilik deb biladi. Xalqaro hamjamiyat noroziligiga qaramay, Isroil so‘nggi o‘n yilliklarda G‘arbiy sohilda o‘nlab aholi punktlari qurdi, ularda 500 mingga yaqin yahudiylar bilan birga 3 millionga yaqin falastinliklar yashaydi. May oyi oxirida isroilliklar G‘arbiy sohilda yana 22 ta aholi punkti qurishni rejalashtirayotgani ma’lum bo‘ldi. Vadeful avvalroq buni qoralagan edi.