Malayziya kompaniyalari konsorsiumi O‘zbekistonga savdo missiyasini amalga oshiradi

Malayziya o‘rta darajadagi kompaniyalar konsorsiumi (MCMTC, Malaysian Consortium Mid-tier Companies) vakillari bilan videokonferensiya ko‘rinishida uchrashuv o‘tkazildi.

Foto: Dunyo

Uchrashuvda MCMTC ijrochi direktori Karen Feyrklauf bilan 2025 yil 5-8 noyabr kunlari MCMTC va unga a’zo kompaniyalar vakillaridan iborat (jami 20 kishi) delegatsiyaning O‘zbekistonga savdo missiyasini tashkil etishga kelishib olindi.

Savdo missiyasidan maqsad – O‘zbekistonda savdo va investitsiyaviy loyihalarni amalga oshirish imkoniyatlarini o‘rganish, davlat va mahalliy korxonalar bilan ikki tomonlama hamkorlik muzokaralarini o‘tkazish.

Malayziya tomoni O‘zbekistonga tashrifi davomida Savdo-sanoat palatasi a’zolari bilan B2B uchrashuvlarini o‘tkazish, Toshkent shahrida joylashgan chakana savdo, logistika va omborxona, oziq-ovqat mahsulotlari ishlab chiqarish faoliyati bilan shug‘ullanuvchi korxonalarga tashrif buyurib, hamkorlik bo‘yicha muzokaralarini olib borishni rejalashtirmoqda.

Ikki mamlakat savdo-iqtisodiy aloqalarni yanada rivojlantirish uchun MCMTC vakili O‘zbekistonlik yetakchi tadbirkor ayollarini 2025 yil 25-27 noyabr kunlari Kuala-Lumpur shahrida bo‘lib o‘tadigan WE2025: Future in Motion – Women in Trade, Investment, Leadership ko‘rgazmasida MCMTC pavilonida o‘z mahsulot va xizmatlari, texnologiya va ishlanmalari bilan ishtirok etishga taklif qildi.