Polsha Germaniya va Litva bilan chegarada nazoratni uzaytirdi

Polsha hukumati Germaniya va Litva bilan chegaralardagi chegara tekshiruvlarini yana oltmish kunga, 4 oktyabrgacha uzaytirdi. «Juma kuni (1 avgust) tegishli buyruq chiqarildi, u xabardor qilish uchun Yevrokomissiyaga yuborildi. Germaniya va Litva bilan chegaralardagi chegara nazorati yana 60 kunga, 4 oktyabrgacha uzaytirildi», — deya ma’lum qildi Polsha ichki ishlar vaziri Marchin Kervinskiy chegara nazorati masalalari bo‘yicha idoralararo yig‘ilishda.

Polsha-Litva chegarasi kontekstida Polsha Ichki ishlar vazirligi rahbari «noqonuniy migratsiya uchun sharqiy yo‘l yopilishini» ham e’lon qildi. «Bizning to‘siqning 98 foizlik qattiqligi Belarus xizmatlari, Rossiya xizmatlari va noqonuniy migratsiyani boshqa uchastkalarga o‘tishga majbur qiladi», dedi u.

Kervinskiyning qo‘shimcha qilishicha, Polsha rasmiylari har ikki davlat bilan chegaralar bo‘yicha keyingi chora-tadbirlar to‘g‘risida qarorni sentabr oyida qabul qiladi va bu chegara xizmati, politsiya va Polsha armiyasi tomonidan taqdim etilgan ma’lumotlarga bog‘liq bo‘ladi.

Polsha-Germaniya chegarasida tanlangan tekshiruvlar 7 iyul kuni yarim tunda 52 ta nazorat-o‘tkazish punktida boshlandi. Xuddi shunday choralar Litva bilan chegarada ham amalga oshirildi. O‘shanda Polsha rasmiylari tekshiruvlarni 5 avgustda yakunlashni rejalashtirgan edi.