Qozog‘iston Prezidenti Tanzila Norboyevani orden bilan mukofotladi

Qozog‘iston prezidenti Qosim Jomart-To‘qayev O‘zbekiston Respublikasi Oliy Majlisi Senati raisi Tanzila Norboyevani 2-darajali “Do‘stlik” ordeni bilan mukofotladi. Bu haqda Oqo‘rda matbuot xizmati xabar berdi.

Norboyeva boshchiligidagi parlament delegatsiyasi rasmiy tashrif bilan Ostona shahrida bo‘lib turibdi.

Tashrif doirasida Qozog‘iston Parlamenti Senati raisi Maulen Ashimbayev va Parlamenti Majlisi raisi Yerlan Koshanov bilan uchrashuvlar o‘tkazgan Tanzila Norboyeva Qozog‘iston prezidenti qabulida ham bo‘ldi.

Suhbat chog‘ida parlamentlararo aloqalarni rivojlantirish kontekstida Qozog‘iston-O‘zbekiston strategik sheriklik va ittifoqchilikning dolzarb masalalari muhokama qilindi.

Qosim-Jomart To‘qayev Tanzila Norboyevaning ikki xalq o‘rtasidagi do‘stlik va yaxshi qo‘shnichilik rishtalarini mustahkamlashga qo‘shgan shaxsiy hissasini yuqori baholadi hamda ikki tomonlama strategik hamkorlikni chuqurlashtirish yo‘lidagi sa’y-harakatlari uchun uni 2-darajali “Do‘stlik” ordeni bilan taqdirladi.