AQSh Xalqaro jinoyat sudining to‘rt nafar vakiliga qarshi sanksiyalar joriy etdi

AQSh Xalqaro jinoyat sudining yana to‘rt nafar vakiliga qarshi sanksiyalar joriy etdi. Bu haqda AQSh davlat departamenti saytida ma’lum qilindi.

Xabar qilinishicha, sudyalar Kimberli Prost va Nikolya Giyu hamda XJS prokurori o‘rinbosarlari Najat Shamim Xon va Mam Mandiay Niangga nisbatan sanksiyalar kiritilgan.

Davlat departamentining ta’kidlashicha, ular XJSning AQSh va Isroilning roziligisiz bu mamlakatlar fuqarolarini ta’qib qilish, hibsga olish yoki sudlovga tortish faoliyatiga aloqador.

Iyun boshlarida AQSh amerikalik va isroilliklarni qo‘lga olishga uringani uchun XJSning to‘rt nafar sudyasiga qarshi sanksiyalar joriy etgandi.

8 fevralda esa Xalqaro jinoyat sudi prokurori Karim Xon AQSh sanksiyalariga tushgan.