Prezident eksport qarzdorligiga moratoriy e’lon qildi

Savdo-sanoat palatasida o‘tgan ochiq muloqotda tadbirkorlar qarzni bir necha oyga kechiktirishni so‘ragan edi. Prezident esa so‘ralganidan ham kengroq yengillikni e’lon qildi: eksportda muddati o‘tgan qarzdorlik uchun jarima hisoblash va undirish bir yilga to‘xtatildi.

Foto: Prezident matbuot xizmati

Ayni vaqtda Tadbirkorlar kuni munosabati bilan prezident Shavkat Mirziyoyevning tadbirkorlar bilan uchrashuvi o‘tmoqda.

Uchrashuvda davlat rahbari davlat ulushi bo‘lmagan korxonalarga eksportda muddati o‘tgan qarzdorlik uchun jarima hisoblash va undirishga bir yillik moratoriy e’lon qildi.

Bu masala 4 avgust kuni Savdo-sanoat palatasi tomonidan o‘tkazilgan tadbirkorlar bilan ochiq muloqotda ko‘tarilgan edi. Tadbirkorlar qarzni 2-3 oyga kechiktirishni so‘ragan, prezident esa bir yillik to‘liq moratoriyni tasdiqladi. Natijada, tadbirkorlar so‘ragan imkoniyatdan ham kengroq va tizimli yechim qabul qilindi.

Bugungi ochiq muloqotga tayyorgarlik davomida 26 ta sohaning 7 mingga yaqin vakillari bilan alohida-alohida uchrashuvlar o‘tkazildi. “Koll-markaz” orqali ham 13 mingdan ziyod murojaat va tashabbuslar kelib tushdi.

Tayyorlagan: Комрон Чегабоев

#eksport #tadbirkor