Correctiv: Z-faol Germaniyada Rossiya armiyasi uchun pul yig‘moqda

Ukrainadagi urushni qo‘llab-quvvatlovchi faol Nikolay Fast Germaniyada Donbassga «insonparvarlik yordami uchun» pul yig‘moqda, lekin aslida u Rossiya armiyasi uchun asbob-uskunalar sotib olmoqda, deb yozadi Correctiv nemis nashri.

Foto: Ijtimoiy tarmoqlar

Telegramʼda Germaniyada yashovchi Z-faol tomonidan yaratilgan, deyarli 5500 kishidan iborat chatlar tarmog‘i bor, u boshqa narsalar qatorida Ukrainada jang qilayotgan Rossiya armiyasi bo‘linmalari uchun jihozlar sotib olish uchun pul yig‘adi. Bu haqda 25 avgust, dushanba kuni Germaniyaning Correctiv nashri yozgan.

Nashr qahramoni — Nikolay Fast. U Sibirda tug‘ilgan va 1990-yillarda 16 yoshida Germaniyaga ko‘chib kelgan. Faolning ta’kidlashicha, u Bundesverda tayyorgarlikdan o‘tgan va Leopard tankini boshqargan. Keyin Fast Rossiyaning «Nochnyye volki» mototsikl klubi bilan bog‘langan. Correctiv uning Vladimir Putinga yaqin ekani ma’lum bo‘lgan Aleksandr Zaldostanov rahbar hisoblangan klub a’zolari bilan tushgan fotosuratlariga ishora qiladi.

Correctiv ma’lumotlariga ko‘ra, Rossiyaning Ukrainaga keng miqyosli bostirib kirishi boshlanganidan ko‘p o‘tmay, Fast Telegram'da Germaniyaning rusiyzabon aholisiga qaratilgan «Bratskaya motopomoshch» chat guruhini yaratdi. Dastlabki maqsad Yevropa Ittifoqi orqali harakatlanishda muammolarga duch kelgan rossiyalik yuk tashuvchilarga yordam berish edi.