Axios: Tramp Ukraina bo‘yicha muzokaralardan chiqish haqida o‘ylayapti

AQSh prezidenti Donald Tramp Rossiyaning Ukrainaga qarshi urushini to‘xtatish bo‘yicha diplomatik sa’y-harakatlardan «bir yoki ikkala tomon ko‘proq moslashuvchanlik ko‘rsata boshlamaguncha» voz kechish haqida jiddiy o‘ylayapti. Bu haqda Oq uyning yuqori martabali mulozimiga tayanib, Axios portali xabar berdi. «O‘tirib tomosha qilamiz, yana bir oz urishishsin, nima bo‘lishini ko‘ramiz», dedi u.

Nashrda ta’kidlanganidek, ba’zi amerikalik rasmiylar Yevropa yetakchilarini kelishuv yo‘lidagi «asosiy to‘siq» deb hisoblay boshladi. Oq uyning yuqori martabali mulozimlariga ko‘ra, ba’zi Yevropa yetakchilari Trampning tinchlikka erishish sa’y-harakatlarini ochiqchasiga qo‘llab-quvvatlab, yashirincha Tramp va Rossiya prezidenti Vladimir Putinning Alyaskadagi sammitidan so‘ng erishilgan «o‘zgarishlarni bekor qilishga» harakat qilmoqda.

Oq uy rasmiylari Ukrainani «Rossiyadan noreal hududiy imtiyozlar olishga» undayotgan Yevropa yetakchilariga nisbatan «sabrini yo‘qotmoqda», deb yozadi Axios. AQSh rasmiylariga ko‘ra, yevropaliklar Ukraina prezidenti Volodimir Zelenskiyga «yaxshiroq kelishuv»ga erishish uchun bosim o‘tkazmoqda.