Zelenskiy va Putin uchrashuvga «hozircha tayyor emas» - Erdo‘g‘an

Turkiya prezidenti Rajab Toyyib Erdo‘g‘an Rossiya prezidenti Vladimir Putin va Ukraina prezidenti Volodimir Zelenskiy bilan urush masalalarini muhokama qildi.

Ushbu muzokaralar yakunida Turkiya yetakchisi ular ikki tomonlama uchrashuvga «hali tayyor emasligini» aytdi, deb xabar berdi Milliyet.

Erdo‘g‘anning ta’kidlashicha, Xitoyda Putin bilan muzokaralar va Zelenskiy bilan telefon orqali suhbat chog‘ida Ukrainadagi urushni to‘xtatish yo‘llarini muhokama qilgan, biroq tomonlar yetakchilar uchrashuviga «hali tayyor emas».

Turkiya rahbari so‘nggi oylarda Istanbulda bo‘lib o‘tgan Rossiya va Ukraina rasmiylari o‘rtasidagi muzokaralar tinchlikka yo‘l ochiqligini ko‘rsatganini ta’kidladi. Turkiya tinchlikka bo‘lgan umidlarni aniq natijalarga aylantirish uchun «muzokaralar darajasini bosqichma-bosqich oshirish» tarafdori bo‘lib, har qanday tashabbus oxir-oqibat yetakchilar darajasida ko‘rib chiqilishi kerakligini qo‘shimcha qildi, garchi sharoitlar hali yaratilmagan bo‘lsa ham.