Firibgarlikda ayblanib, qidiruvda bo‘lgan shaxslar Turkiyadan deportatsiya qilindi

Turkiya va O‘zbekiston Ichki ishlar vazirliklari hamkorligida o‘tkazilgan kompleks tezkor-qidiruv tadbirlari natijasida firibgarlik jinoyatini sodir etganlikda ayblangan 3 shaxs qo‘lga olinib, O‘zbekistonga deportatsiya qilindi. Ular qidiruvda bo‘lgan. Bu haqda O‘zbekistonning Istanbul shahridagi Bosh konsulxonasi xabar berdi.  

Ma’lum qilinishicha, qo‘lga olingan va O‘zbekistonga deportatsiya qilingan shaxslar 1982 yilda Buxoro viloyatida tug‘ilgan Arabov G‘anijon Murodilloyevich, 1992 yilda Samarqand viloyatida tug‘ilgan Boboyusupova Shoxista To‘qsanboy qizi hamda 1970 yilda Navoiy viloyatida tug‘ilgan Muqimova Gulzoda Xushvaqtovna bo‘lgan.

Ushbu shaxslarning xatti-harakatlaridan jabr ko‘rgan fuqarolardan IIV yoki uning quyi tizimlariga, O‘zbekistonning Istanbul shahridagi Bosh konsulxonasiga murojaat qilish so‘ralgan. Shuningdek, keyingi vaqtlarda firibgarlik sodir etilishi holatlari yuzasidan Bosh konsulxonaga kelayotgan murojaatlar soni ortgani ma’lum qilingan. Bosh konsulxona fuqarolarni firibgarlarga aldanib qolmaslikka chaqirgan.

Oldinroq Interpol qidiruvida bo‘lgan o‘zbekistonlik Tailandda ushlanib, O‘zbekistonga deportatsiya qilingandi.